Briganti
O sangue è passato ancora ‘ncopp a sta terra amara, ‘a morte se fa destino, ‘o sfreggio addiventa storia. O fierro jesce d’è pate n’annz’all’uocchie d’è criature, chiagnene senza riuscì ‘e piccerille annure. L’Italia s’accresciarrà cu ‘o latte d’arraggia e do rancore, s’arranno cittadini senza nisciuno onore. Sarranno terre luntane, lacrime, bastimenti, ‘o mezzo pe se scurdà ‘e tuorte e i tradimenti. Pe nun assaggià e cumanne dè surdati d’int ‘e case noste, ‘e ‘nsurte, ‘e turmiente, ‘e scuorne, ca trasene d’int’a l’ossa. E sarrà l’arte e campà, e nun credere cchiù a nisciuno, sarrà l’arte ‘e ‘mbruglia pe nun se cuccà diuno. sarranno guappi e ‘mpechere, mariuole, sante, ruffiani, sarranno duchi e zandraglie, prievete e ciarlatani,prufumo d’int’e palazzi, sottane e parapalle, vasci umidi e scuri, vocche cu ‘o sciato ‘e cepolle, na pizza cu ‘o nomme ‘e reggina, e chi fu nemico d’ajere, e nepute e chi fu BRIGANTE, s’arranno carabinieri, sarrà na ferita aperta sott’all’acqua e ‘o sole, nu cuorp ca se stuta senza jettà n’addore, n’allucca senza voce ca passa pe terre e città, na ‘nziria senza nomme ca a notte te vene a truvà, gente senza pace truvarrà giuste ‘e parole p’è meglio annasconnere ‘e cose ca dicere nu vole, s’adda avutà sempe a capa a chello ca tocca ‘o core, savarrà scurdà a ‘nnucenzia, sarrà a ‘ndurzà l’ammore, sarrà a recità ‘a cummedia pe strade e pe d’int’e liette, sarrà fa suffrì a chillato sul pe fa rispietto. E ‘o friddo scava ‘a cuscienza, l’omertà se fa sfizio, pe l’uommene da terra mia nun ce sarrà cchiù giustizia. Ma io canto, canto, canto. Canto pe tutti quanti. Canto pe ddà curaggio, canto pe ddà ‘a speranza. Canto pa dignità, ca n’avimma avuta tanta, canto, nu canto d’uommene ca so stati briganti !
Nessun commento:
Posta un commento